ཕྱི་ལོ་ ༢༠༡༥ ཟླ་ ༧ ཚེས་ ༢༢།༢༣ ཉིན་གཉིས་རིང་དབུས་གཙང་དམ་པ་ཆོས་ཀྱི་ཆོལ་ཁའི་འགན་འཛིན་ལྷན་ཚོགས་ཐེངས་ ༡༢ པ་དྷ་སྟེང་དབུས་གཙང་ཚོགས་ཁང་དུ་བསྐྱངས་པའི་གྲོས་གཞི་གྲོས་ཆོད་ཁག་གཤམ་གསལ། གྲོས་གཞི་དོན་ཚན་དང་པོ། ཐུགས་གལ་ཆེ་ཤོས་སྤྱི་ནོར་༸གོང་ས་༸སྐྱབས་མགོན་ཆེན་པོའི་༸སྐུ་ཕྱྭའི་འགན་སྲུང་སྲི་ཞུ་ཚགས་ཚུད་སྒྲུབ་ཕྱོགས་སྐོར། གཞི་རྒྱ་ཆེ་བའི་དབུས་གཙང་མང་ཚོགས་ཀྱི་རེ་འདུན་ལས་གྲུབ་པའི་གལ་ཆེའི་དགོངས་འཆར་ཁག་ཕྱོགས་བསྡོམས་དགོངས་བསྡུར་གནང་རྒྱུ། གྲོས་ཆོད། ༡༽ ད་བར་རྒྱ་གར་དབུས་སའི་གཞུང་དང། བོད་མིའི་སྒྲིག་འཛུགས་ཀྱི་བདེ་སྲུང་ལྷན་ཁང་བཅས་ནས་༸རྒྱལ་བའི་སྐུ་ཕྱྭའི་སྲུང་སྐྱོབ་སྲི་ཞུའི་ཐད་ཚགས་ཚུད་ཐུགས་ཁུར་ཆེ་བཞེས་ལ་བཀྲིན་ཆེ་ཞུ་དང་འབྲེལ། ཕྱོགས་ཕེབས་ཆིབས་བསྒྱུར་གདན་ཞུའི་སྐབས་ཕྱི་ནང་གསང་གསུམ་གྱི་རྟོགས་ཞིབ་ཉམས་སྣང་འཕྱུག་མེད་ཡོང་བའི་འབོད་བསྐུལ་སྙན་འབུལ་ཞུ་རྒྱུ། ༢༽ ༸སྐུ་བཅར་ཞབས་ཞུ་བ་དང། སྐུ་སྲུུང་མི་འགྲོ་རྣམས་བློ་བརྟན་འགྱུར་མེད་ཚད་ལྡན་དྲག་འདེམས་བསྐོ་འཛུགས་དང། གྲངས་སྣོན། གཞི་རིམ་སྦྱོང་བརྡར་དང། ཟབ་སྦྱོང། དུས་རབས་དང་མཐུན་པའི་སྲུང་སྐྱོབ་སྲི་ཞུའི་ཐད་ཀྱི་ཆ་རྐྱེན་འཕྲུལ་ཆས་དགོས་མཁོ་ཁག་གོ་སྒྲིག་གནང་ཕྱོགས་ཡོང་བ་ཞེས་འབྲེལ་ཡོད་ལ་སྙན་སེང་ཞུ་རྒྱུ་མ་ཟད། མང་ཚོགས་ནས་ཀྱང་དེའི་དཔལ་འབྱོར་གྱི་མཐུན་འགྱུར་དགོས་གལ་རིགས་᪱མཁོ་གྲུབ་ཞུས་འོས་ཞུ་རྒྱུ། ༣༽ བཞུགས་སྒར་གཙོ་གྱུར་གཞིས་ཆགས་ཆོས་སྒར་ཁག་ལ་གདན་ཞུ་ཆིབས་བསྒྱུར་བསྐྱངས་སྐབས་གཞི་རིམ་མང་ཚོགས་ཁྱོན་ཡོངས་ལ་ལུས་བཤེར་ནན་འདྲོངས་དང། དཔར་ཆས་དང་ཁ་དཔར་སོགས་འཕྲུལ་ཆས་འདྲ་མིན་བཀག་བསྡོམས་གནང་རྒྱུར་སྐུ་བཅར་སྐུ་སྲུང་བ་ཚོས་དམ་པ་དོན་གཉེར་ཡོང་བ་ཞུ་རྒྱུ།༤༽ ནང་གི་ཞབས་རིམ་བཀའ་བཞིན་སྒྲུབ་པའི་མཆོད་པ་གཙོ་གལ་ཆེ་བར་སོང། ༸རྒྱལ་བའི་དགོངས་གཞི་ལྟར་ཆོལ་གསུམ་བོད་མི་ནང་ཁུལ་བློ་དཀར་དམ་གཙང་ངང། ཆོལ་ཁོངས་ཚོགས་པ་སྐྱིད་སྡུག་ལུང་ཚན་དང་བཅས་པ་ཆིག་བསྒྲིལ་གྱི་བབ་བསྟེགས་བརྟན་པོའི་ཐོག་ནས་དབུས་གཙང་ཆོལ་ཁ་ཙམ་མ་ཟད། གངས་ཅན་བོད་སྤྱིའི་འདི་ཕྱིའི་སྐྱབས་གནས་༸གོང་ས་༸སྐྱབས་མགོན་ཆེན་པོ་མཆོག་ལ་བློ་བརྟན་འགྱུར་མེད་ཀྱི་དད་དམ་གཙང་སྲུང་བཀའ་དགོངས་འགལ་མེད་སྲི་ཞུ་ནུས་ཐོན་གོང་སྤེལ་གཏོང་རྒྱུ་། ༥༽གནས་ཚུལ་ཁུངས་ལྡན་མང་པོས་སྔོན་བརྡ་ར་འཕྲོད་བྱུང་བ་ལྟར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱར་གནོད་འཚེ་གཏོང་མཁན་དོལ་རྒྱལ་རྗེས་བྲངས་པ་ཡིན་པའི་དངོས་ར་གསལ་འཕྲོད་བྱུང་བ་ལགས་ན། དོལ་རྒྱལ་བསྟེན་གསོལ་ཁ་འཁྱེར་རྒྱ་དམར་རྒྱུགས་ཁྱི་དོལ་རྒྱལ་རྗེས་འབྲང་པ་སྤྱི་དང་ལྷག་པར་དབུས་གཙང་ཆོལ་ཁའི་ཁྱབ་ཁོངས་དོལ་རྒྱལ་རྗེས་འབྲང་པ་རེ་ཟུང་ནས་༸་གོང་ས་མཆོག་ལ་བློ་ཡུལ་ལས་འདས་པའི་མཚན་དམད་ཞུ་མཁན་ཡོངས་ལ་ད་ལམ་དབུས་གཙང་དམ་ཆོས་ཀྱི་ཆོལ་ཁའི་འགན་འཛིན་ལྷན་ཚོགས་ཐེངས་ ༡༢ པའི་ཚོགས་བཅར་བ་ཡོངས་ནས་ངོ་རྒོལ་མཐའ་གཅིག་ཏུ་བྱ་རྒྱུར། དེ་དོན་དབུས་གཙང་རྒྱ་ཆེའི་མང་ཚོགས་ནས་དུས་དང་རྣམ་ཀུན་ཏུ་ཡིད་གཟབ་དང་འབྲེལ་རྣམ་དཔྱོད་ལྡན་པའི་གདོང་ལེན་གནང་དགོས་རྒྱུ། ༦།༸གོང་ས་༸སྐྱབས་མགོན་ཆེན་པོ་མཆོག་ནི་གངས་ཅན་པ་ཡོངས་ཀྱི་བལྟ་བའི་མིག་དང་ཁོག་པའི་སྙིང་ལྟ་བུ་ཡིན་པས་རྒྱལ་བའི་སྐུ་ཕྱྭར་སྐུ་འགེག་ཆ་ཕྲ་མོ་ཙམ་ཡང་མི་བཞེས་པའི་སྐུ་ཕྱྭའི་ཞབས་རིམ་སྨིན་སྒྲུབ་ཞུ་རྒྱུ་ནི་དོན་གྱི་སྙིང་པོ་ཡིན་སྟབས་། དབུས་གཙང་ཁྱབ་ཁོངས་ས་གནས་དང་། དགོན་ཁག་ཚོགས་སྐྱིད་བཅས་ནས་ལོ་ལྟར་ཉིན་བརྒྱ་དུས་གཅིག་ཏུ་སྐུ་ཕྱྭའི་ཞབས་རིམ་སྨིན་སྒྲུབ་ཞུ་རྒྱུ། གྲོས་གཞི་དོན་ཚན་གཉིས་པ། དབུས་གཙང་དབུས་དང་། རྒྱ་ཆེའི་ས་རྒྱུན་འབྲེལ་མཐུད་ཁག་གི་ལོ་འཁོར་ལས་བསྡོམས་དང། རྩིས་ཁྲ་ཚོགས་དབུས་༸སྙན་སེང་དང་འབྲེལ། སྔ་ལོའི་གྲོས་ཆོད་དགོངས་དོན་ལས་དོན་ཕྱག་ལེན་འཁེལ་དང། འགེལ་བསྡད་ཁག་ལ་དྭོགས་གཅོད་བགྲོ་གླེང་གཏན་འབེབ་གནང་འོས་གནང་རྒྱུ། གྲོས་ཆོད་། དབུས་གཙང་ཆོལ་ཁུངས་ཀྱི་ས་རྒྱུ་ཁག་ ༣༥ དང་འབྲེལ་མཐུད་པ་ ༥ ཡོད་པ་ནས་སྐབས་འདིར་ས་གནས་སོ་སོའི་དཀའ་ངལ་དབང་གིས་ཚོགས་བཅར་མ་ཐུབ་པའི་ས་གནས་ཁག་གཅིག་ཕུད། ད་ལམ་འགན་འཛིན་ལྷན་ཚོགས་སུ་ངོ་བཅར་ས་རྒྱུན་༢༣ དང། འབྲེལ་མཐུད་༢ བཅས་ནས་ལས་བསྡོམས་དང་རྩིས་ཁྲ་ཚོགས་ཐོག་སྙན་སེང་གིས་ཕན་ཚུན་གོ་རྟོགས་ཡར་རྒྱས་དང། ཕྱིན་ཆད་ལས་བསྡོམས་དང་རྩིས་ཁྲའི་ས་བཅད་འགོ་མཆན་འགོད་སྟངས་དབུས་ནས་ཕྱོགས་མཚུངས་ཡོང་ཐབས་བཀོད་བསྡོམས་གནང་རྒྱུར་དགོངས་མཐུན་བྱུང། གྲོས་གཞི་དོན་ཚན་གསུམ་པ། དབུས་གཙང་ཆོལ་ཁའི་སེར་སྐྱ་མང་ཚོགས་ནས་དུས་དང་རྣམ་པ་ཀུན་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དགོངས་གཞི་ལས་ཆ་ཙམ་མི་འགལ་བའི་ནང་ཁུལ་དམ་ཚིག་ཁྲིམས་སྡོམ་རང་སྲུང་དང། ཡུལ་དུས་དང་མཐུན་པའི་བླང་དོར་སྒྲིག་བཀུར་ཚུལ་མཐུན་སྔར་ལྷག་ཞུ་ཕྱོགས་ཇི་དགེའི་སྐོར། གྲོས་ཆོད། ༡༽ དབུས་གཙང་སེར་སྐྱ་མང་ཚོགས་ཀྱི་ངོས་ནས་༸གོང་ས་༸སྐྱབས་མགོན་ཆེན་པོའི་བཀྲིན་སྙིང་བཅངས་ཐོག་ནང་ཁུལ་འཐེན་འཁྱེར་ཕྱོགས་རིས་ཀྱི་དབང་དུ་མ་སོང་བར། གངས་ཅན་ཆོལ་ཁ་གསུམ་གྱི་གོང་བུའི་ནུས་སྟོབས་སྤྱི་དང། ཡང་སྒོས་དབུས་གཙང་ཆོལ་ཁའི་ཆིག་བསྒྲིལ་ལ་རྒྱ་དམ་བརྟན་ཡོང་བར་དབུས་ས་གཉིས་ནས་ཤུགས་གནོན་བསྐྱོན་རྒྱུ། ༢༽ ༸རྒྱལ་བའི་དགོངས་གཞི་གཙོ་བོ་སྤྱི་ཚོགས་འཆམ་མཐུན་དང། ཡ་རབས་བཟང་སྤྱོད། བོད་མི་རིགས་ཀྱི་སྐད་ཡིག་རིག་གཞུང་མི་ཉམ་རྒྱུན་འཛིན་དར་རྒྱས་ཡུན་གནས་ཀྱི་ཐད་ལ་རང་རིགས་རྒན་གཞོན་ཚང་མས་ནུས་ཤུགས་གོང་སྤེལ་གནང་ཐབས་དང་། ཡང་སྒོས་བློ་གསར་གཞོན་སྐྱེས་གསོ་སྐྱོང་དང་འབྲེལ་སྤྱི་ཚོགས་ལས་དོན་འགན་བསྐུར་གནང་ཕྱོགས་ཐད་འབད་བརྩོན་ཆེ་བསྐྱེད་དུས་བབས་གལ་ཆེའི་འོས་འགན་ལ་ཐུག་ཡོད། ༣༽ མི་རབས་བགྲེས་པ་བྱས་ཅན་ཁག་དང། རིགས་གཅིག་རྐང་འཛིན་གྱི་མཁས་པ་མཁྱེན་ཡོན་ཅན་རྣམ་པར་དུས་ནས་དུས་སུ་ཆེ་བཀུར་གཟེངས་རྟགས་དང། བཀའ་སློབ་ལམ་སྟོན་ཞུས་འོས་ཞུ་རྒྱུ། གྲོས་གཞི་དོན་ཚན་བཞི་པ། བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་སྤྱི་བཀུར་དང་འབྲེལ་དབུས་བོད་མིའི་སྒྲིག་འཛུགས་ཀྱི་སྣེ་འཁྲིད་མཛད་བྱུས་ཁག་ལ་དབུས་གཙང་མང་ཚོགས་ནས་མཐུན་ཕྱོགས་ཀྱི་རྒྱབ་སྐྱོར་ཞུ་ཕྱོགས་ཇི་དགེའི་སྐོར། གྲོས་ཆོད། ༡༽ བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་སྤྱི་བཀུར་ཐོག་དབུས་སྒྲིག་འཛུགས་ནས་སྣེ་འཁྲིད་མཛད་པའི་དབུ་མའི་ལམ་གྱི་སྲིད་བྱུས་འོག་དབུས་གཙང་མང་ཚོགས་ནས་ཁ་ཞེ་གཉིས་མེད་ཀྱི་ཤར་བསྐྱོད་ཞུ་རྒྱུ། ༢༽བོད་མིའི་སྒྲིག་འཛུགས་ཀྱི་སྣེ་འཁྲིད་མཛད་བྱུས་ཁག་ལ་དབུས་གཙང་མང་ཚོགས་ནས་དེ་སྔ་རང་གཞུང་དགའ་ལྡན་ཕོ་བྲང་ལ་དབུ་འོག་དཔུང་འདེགས་ཇི་ཞུས་ལྟར་དབུས་བོད་མིའི་སྒྲིག་འཛུགས་ལའང་དབྱེར་མེད་ཞུ་རྒྱུ། གྲོས་གཞི་དོན་ཚན་ལྔ་པ། ད་ཕན་རང་ཕྱོགས་ནས་དགོངས་ཡངས་ཐབས་བྱུས་གུ་བཤང་ཇི་མཛད་ལ་དོན་ཕན་ཡོང་དཀའི་རྒྱ་ནག་གཞུང་གིས་རང་ཁེ་མཁྲེགས་བཟུང། བོད་དང་བོད་མིར་དོ་མེད་སྣང་ཆུང་བྱེད་ཕྱོགས་ལ་གཞིགས་པའི་གཉིས་སྨན་དབུ་མའི་ལམ་བཟང་རྒྱ་ཆེའི་མང་ཚོགས་ལ་གོ་རྟོགས་སྤེལ་ཕྱོགས་ཇི་དགེ་དང། གཞིས་ལུས་རྒྱ་ཆེའི་སྤུན་ཟླ་མང་ཚོགས་ཀྱིས་འཇིགས་ཞུམ་སྤངས་པའི་བློས་གཏོང་དང། རེ་བཅོལ་ཆུས་ཟོས་སུ་མི་འགྲོ་བའི་ཐད་བྱེས་འབྱོར་མང་ཚོགས་ནས་དོན་དམ་བཟང་ཕྱོགས་ཀྱི་ཕན་སྐྱོབ་གནང་སྒོ་གང་མཆིས་སྐོར། གྲོས་ཆོད། ༡༽ དབུས་བོད་མིའི་སྒྲིག་འཛུགས་ཀྱི་ངོས་ནས་དུས་འགྱངས་ཕྱི་གཤོལ་དུ་མ་སོང་བར་བོད་རྒྱ་འབྲེལ་མོལ་བསྐྱར་མཐུད་ཡོང་བར་བཀའ་ཤག་ནས་དམིགས་བསལ་ཐུགས་འཁུར་ཆེ་བཞེས་ཡོང་བའི་གསལ་འདེབས་ཞུ་རྒྱུ་དང་། དབུས་གཙང་དབུས་ས་གཉིས་ནས་ཀྱང་སྐབས་བབས་རྒྱལ་སྤྱིའི་ཆབ་སྲིད་འགྱུར་འགྲོས་དང་བསྟུན་པས་འཛམ་གླིང་ཡུལ་གྲུ་ཁག་ལ་བདེན་སྐྱོབ་སྙན་འབུལ་ཞུ་རྒྱུ། ༢༽ དབུས་གཙང་མང་ཚོགས་ནས་ད་ཆ་དབུ་མའི་ལམ་གྱི་ཁྱད་ཆོས་ངེས་ཤེས་ཐུབ་པའི་ཐོག་ནས་གོ་སྐབས་དམ་འཛིན་འོས་འགན་དྭང་ལེན་གྱིས་གང་ལ་ཇི་འོས་ཀྱི་ལས་འགུལ་དབུས་ས་གཉིས་ནས་གང་མང་སྤེལ་རྒྱུ། གྲོས་གཞི་དོན་ཚན་དྲུག་པ། དབུས་གཙང་མང་ཚོགས་ཀྱི་འཚོ་གནས་དང། ཤེས་ཡོན་སློབ་གསོ། རྒས་ནད་གཅོང་གསུམ་ལ་རོགས་སྐྱོབས། འཕྲོད་བསྟེན་མཐུན་རྐྱེན་གནས་སྟངས་བཅས་གཞི་སྙོམ་བབས་ཆགས་དོ་བརྟན་ཡོང་ཐབས་དང་འབྲེལ། དབུས་གཙང་ཆོལ་ཁའི་དབུས་དང་། ས་གནས་ཁག་གི་སྒྲིག་འཛུགས་རྟེན་གཞི་ཡར་རྒྱས་ཚགས་ཚུད་ཡོང་སླད་ཐབས་ཤེས་ལས་བྱུས་གང་དགེའི་སྐོར། གྲོས་ཆོད། ༡༽ དབུས་གཙང་ཆོལ་ཁའི་མང་ཚོགས་ཀྱི་འཚོ་གནས་དང། ཤེས་ཡོན་སློབ་གསོ། རྒས་ནད་གཅོང་གསུམ་ལ་རོགས་སྐྱོབས། འཕྲོད་བསྟེན་གནས་སྟངས་བཅས་ཀྱི་ཐད་གཞི་རིམ་དཀའ་ངལ་ཁག་ས་རྒྱུན་འབྲེལ་མཐུད་སོ་སོས་འགན་འཁུར་གནང་རྒྱུ་དང། ས་གནས་སོ་སོས་དཀའ་སེལ་མ་ཐུབ་པའི་རིགས་དབུས་སུ་སྙན་སེང་གནང་རྒྱུ། ༢༽ ཚོགས་ཆེན་ ༡༣ པའི་གྲོས་ཆོད་རྩ་མནན་གྱིས་དབུས་ཀྱི་ཁང་སྐྲུན་ཕྱི་བུན་སྤྲོད་བསྡད་རྣམས་སྤྲོད་འཇལ་ཟིན་མཚམས་རྒྱ་ཆེའི་ས་རྒྱུན་མང་ཚོགས་ལ་ཞི་རྒྱ་ཆེ་བའི་དཀའ་སེལ་ཕན་གྲོགས་མཐུན་སྦྱོར་ཐུབ་པའི་དགོངས་བཞེས་གནང་རྒྱུའི་ལམ་སྟོན་ཡིག་ཆ་ཞིག་དབུས་རྒྱུན་ལས་ནས་ཟིན་བྲིས་བཀོད་དེ་རིང་མིན་ཚོགས་ཆེན་སྐབས་ ༡༤ པར་འཆར་གཞི་སྙན་སེང་ཞུ་རྒྱུ། གྲོས་གཞི་དོན་ཚན་བདུན་པ། རྒྱ་ཆེའི་དབུས་གཙང་ས་གནས་རྒྱུན་ལས་དང། འབྲེལ་མཐུད། དགོན་སྡེ་ཁག ཚོགས་སྐྱིད་ཁག་དང་བཅས་ཀྱིས་མང་གཙོའི་ཁེ་དབང་འགན་འཁུར་དགེ་བེད་མཉམ་སྤྱོད་ཀྱིས། བོད་མིའི་སྒྲིག་འཛུགས་ཀྱི་སྲིད་སྐྱོང་སྐབས་གཉིས་པ་དང། སྐབས་ ༡༦ པའི་བོད་མི་མང་དབུས་གཙང་སྤྱི་འཐུས་ཀྱི་མི་འགྲོའི་འོས་གཞི་ས་བོན་གནང་འབྱོར་ཁག་ལ་འགན་འཛིན་ལྷན་ཚོགས་ནས་གྲངས་བཤེར་གྲོས་བསྡུར་གྱིས་མཐའ་བསྡོམས་འོས་གཞི་ཚད་ལྡན་གཏན་འབེབ་གནང་རྒྱུ་དང། འོས་བསྡུའི་ལས་རིམ་ཁག་དབུས་གཙང་མི་འབོར་ལ་གཞིགས་པའི་འགན་འཁུར་ཁྲིམས་མཐུན་བརྟན་གླིང་ཚགས་ཚུད་དོན་ཚང་ཡོང་ཐབས། གཞན་ཡང། གལ་ཆེའི་སྤྱི་སྨན་དགོངས་འཆར་ཁག་ཕྱོགས་བསྡོམས་གནང་རྒྱུའི་སྐོར་བཅས། གྲོས་ཆོད། སྲིད་སྐྱོང་སྐབས་གཉིས་པ་དང་། བོད་མི་མང་སྤྱི་འཐུས་སྐབས་ ༡༦ པའི་འོས་གཞི་ས་བོན་འདེམས་སྒྲུག་ལས་དོན་ཆེད་ད་ལམ་འགན་འཛིན་ལྷན་ཚོགས་ཀྱི་ཕྱོགས་ཕེབས་ཚོགས་མིའི་ཁྲོད་ནས་བལ་ཡུལ་ས་གནས་ཚོགས་གཞོན་ཁང་དཀར་དབང་ཕྱུག་ལགས་དང་། མོན་གྷོ་ས་གནས་ཚོགས་གཙོ་སྲམ་སྟོད་ཚེ་རིང་རྡོ་རྗེ་ལགས། སྦེལ་ཀོབ་ས་གནས་ཚོགས་གཙོ་ཕུར་བུ་དོན་གྲུབ་ལགས་བཅས་ལ་འོས་བསྡུའི་འགན་འཁུར་ཚོགས་ཆུང་དུ་བསྐོ་བཞག་གནང་སྟེ་དབུས་གཙང་ཆོལ་ཁའི་སྒྲིག་གཞི་དོན་ཚན་ ༢༢ ནང་གསལ་ལྟར་སྤྱི་འཐུས་འོས་གཞི་གཏན་འབེབས་གནང། སྲིད་སྐྱོང་གི་འོས་གཞིའི་ཐད་ས་གནས་ཁག་ནས་གཏང་འབྱོར་འོས་གཞིའི་ས་བོན་གཞིར་བཞག་ཐོག་འགན་འཛིན་ལྷན་ཚོགས་ཀྱི་ཚོགས་བཅར་བ་ཡོངས་ནས་མང་གཙོའི་འགྲོ་ལུགས་དང་མཐུན་པར་གསང་བའི་འོས་ཤོག་འཕེན་ཏེ་འོས་འབོར་མང་ཤོས་གཅིག་ལ་ཁྲིམས་མཐུན་གཏན་འབེབ་ཞུས་པའི་གྲོད་ཆོད་དུ། ༢༠༡༥ ཟླ་ ༧ ཚེས་ ༢༤ ལ།